МАНДАХ ИХ СУРГУУЛИЙН БАКАЛАВРЫН ӨДРИЙН ХӨТӨЛБӨРТ 2019-2020 ОНЫ ХИЧЭЭЛИЙН ЖИЛД ОЮУТАН ЭЛСҮҮЛЭХ ЖУРАМ

НЭГ. ЕРӨНХИЙ ЗҮЙЛ

1. Мандах Их Сургууль (цаашид Мандах ИС гэх)-ийн бакалаврын өдрийн хөтөлбөрт 2019-2020 оны хичээлийн жилд оюутан элсүүлэхэд Монгол Улсын "Дээд боловсролын тухай хууль", Боловсрол, шинжлэх ухааны сайдын 2013 оны 03 дугаар сарын 18-ны А/79 тоот тушаалаар батлагдсан "Оюутан элсүүлэх журам&", Боловсрол, Соёл, Шинжлэх Ухаан, Спортын Сайдын 2018 оны 04 дүгээр сарын 06-ны өдрийн А/194 тоот “Журамд нэмэлт, өөрчлөлт оруулах тухай” тушаал, 2019 оны 04 сарын 17-ны өдрийн А/218 тоот тушаал бусад холбогдох эрх зүйн актуудыг энэхүү журам баримтална.
2. Мандах ИС-ийн бакалаврын өдрийн хөтөлбөрт элсэхээр хүсэлт гаргасан иргэнийг бүртгүүлэгч, элсүүлэх оюутны тоог хяналтын тоо, хяналтын тоонд багтан элсэх эрхээ баталгаажуулсан бүртгүүлэгчийг элсэгч, элсэлтийн үйл ажиллагааг зохион байгуулахаар томилогдсон ажлын хэсгийг элсэлтийн комисс гэнэ.
3. Мандах ИС-ийн бакалаврын өдрийн хөтөлбөрт элсүүлэх элсэгчийн хяналтын тоог Удирдах зөвлөл тогтооно.

ХОЁР. БҮРТГҮҮЛЭГЧДЭД ТАВИГДАХ ШААРДЛАГА

1. Мандах Их Сургуульд бүртгүүлэгч нь бүрэн дундаас дээш боловсрол эзэмшсэн, Боловсролын үнэлгээний төвөөс зохион байгуулсан заавал өгөх монгол хэлний шалгалтыг өгсөн байна.
2. Бүртгүүлэгч нь хүснэгт №1, 2-д заасны дагуу сонгосон хөтөлбөрөөрөө 2 хичээлийн шалгалт өгч, тус сургуулийн босго оноог хангасан байна.

Бүлэг	Элсэлт авах хөтөлбөр, мэргэжлийн чиглэл	Суралцах хугацаа	Элсэлтийн ерөнхий шалгалт ба босго оноо
			Үндсэн шалгалт 1	Дагалдах шалгалт 2
Төв сургууль
I бүлэг	Нягтлан бодох бүртгэл	4 жил	Математик 450	Гадаад хэл 400
			Гадаад хэл 450	Математик 400
II бүлэг	Санхүүгийн менежмент Банкны менежмент	4 жил	Математик 410	Гадаад хэл 400
			Гадаад хэл 410	Математик 400
III бүлэг	Инженер-эдийн засаг Логистик менежмент	4 жил	Математик 410 эсвэл Физик 410	Физик 400 эсвэл Гадаад хэл 400
			Гадаад хэл 410 эсвэл Нийгмийн тухай мэдлэг 410	Физик 400 эсвэл Математик 400
V бүлэг	Гадаад хэлний орчуулагч /англи хэл/	4 жил	Гадаад хэл 410	Монгол хэл 400 эсвэл Нийгмийн тухай мэдлэг 400
			Нийгмийн тухай мэдлэг 410	Гадаад хэл 400 эсвэл Монгол хэл 400
МАНДАХ ИХ СУРГУУЛИЙН МЭДЭЭЛЭЛ, ТЕХНОЛОГИЙН СУРГУУЛЬ
IV бүлэг	Програм хангамж Мэдээллийн систем Компьютерийн сүлжээ	4 жил	Математик 410	Физик 400 эсвэл Гадаад хэл 400
			Гадаад хэл 410 эсвэл Нийгмийн тухай мэдлэг 410	Математик 400 эсвэл Физик 400
	График дизайн	4 жил	Математик 410 эсвэл Физик 410	Ур чадвар 400
			Ур чадвар 410	Математик 400 эсвэл Физик 400

Бүлэг	Элсэлт авах хөтөлбөр, мэргэжлийн чиглэл	Суралцах хугацаа	Элсэлтийн ерөнхий шалгалт ба босго оноо
			Үндсэн шалгалт 1	Дагалдах шалгалт 2
VI бүлэг	Нягтлан бодох бүртгэл	4 жил	Математик 400	Гадаад хэл 400 эсвэл Монгол хэл 400
			Нийгмийн тухай мэдлэг 400	Математик 400

ГУРАВ. БҮРТГЭЛ

1. Бүртгэлийг онлайнаар болон хичээлийн төв байранд явуулна. Онлайнаар бүртгүүлэхдээ www.elselt.mandakh.mn хаягийн “Элсэлт” цонхоор орж, зааврын дагуу бүртгүүлнэ.
2. Хичээлийн төв байранд ирж бүртгүүлэхдээ дараах материалыг бүрдүүлнэ. Үүнд:
   • Иргэний үнэмлэхний хуулбар
   • Бүрэн дунд боловсролын гэрчилгээ
   • Ерөнхий шалгалтын батламж
   • Цээж зураг 2 хувь /2х3/
   • Бүртгэлийн хураамж төлсөн баримт /Бүртгэлийн хураамжийг буцаан олгохгүй/
3. Бакалаврын өдрийн хөтөлбөрт бүртгүүлэгчдийг 2019 оны 06 дугаар сарын 17-аас 07 дугаар сарын 05-ны өдрүүдэд /09:00-18:00 хооронд/ бүртгэнэ.

ДӨРӨВ. ЭЛСЭГЧДИЙГ ШАЛГАРУУЛАХ

1. Энэхүү журмын 2.1, 2.2-т заасан шаардлага хангасан бүртгүүлэгчдээс шалгаруулалт хийхдээ хүснэгт №1-т заагдсан шалгалтын оноогоор хөтөлбөр тус бүрээр жагсаалт гаргана.
2. Шалгаруулалтанд тэнцсэн бүртгүүлэгчдийн нэрсийн жагсаалтыг сургуулийн вэб сайтад /www.mandakh.edu.mn/ тавьж нийтэд мэдээлнэ.
3. Онооны жагсаалтаар хяналтын тоонд багтсан болон хөнгөлөлттэй нөхцлөөр элсэх шаардлага хангасан  бүртгүүлэгчдэд суралцах эрхийн бичгийг зарласан хугацаанд олгоно.
4. Элсэгч нь өөрийн суралцах авъяас чадвар, хувийн зан чанар, хэтийн зорилго, хэрхэн суралцахаа илэрхийлсэн эссе бичиж, элсэлтийн комисст заавал ирүүлнэ.
5. Эрхийн бичиг олгохдоо дараах материалыг эх хувиар нь авна. Үүнд:
   • Бүрэн дунд боловсролын гэрчилгээ
   • Ерөнхий шалгалтын дүнгийн батламж
   • Сурагчийн хувийн хэрэг
   • Иргэний үнэмлэх (хуулбар)
   • Цээж зураг 4 хувь
   • Сургалтын урьдчилгаа төлбөрийн баримт /Сургалтын төлбөрийн 50 хувиас дээш/
   • Эрүүл мэндийн үзлэг /сүръеэ/ хийлгэж, суралцахад саадгүй болох тухай тодорхойлолт
6. Оюутны хөгжлийн зээл, буцалтгүй тусламж авах бол холбогдох дүрэм, журамд заасан бичиг баримтуудыг бүрдүүлсэн байна.
7. Дархан салбар сургуулийн элсэлтийг Дархан хот дахь салбар сургууль өөрийн хичээлийн байранд зохион байгуулна.

ТАВ. ТЭНЦСЭН ЭЛСЭГЧДИЙН БҮРТГЭЛИЙГ БАТАЛГААЖУУЛАХ

1. Бакалаврын өдрийн хөтөлбөрт суралцах эрхийн бичиг авсан элсэгчдийн бүртгэлийг 2019 оны 8 дугаар сарын 19-23-ны өдрүүдэд сургалтын алба баталгаажуулж, "Мандах Их Сургуульд суралцах гэрээ"-г байгуулна.
2. Бүртгэлээ баталгаажуулж, гэрээ байгуулахдаа эцэг эх, асран хамгаалагчийн хэн нэгэнтэй хамт байлцана.
3. "Мандах Их Сургуульд суралцах гэрээ"-г байгуулаагүй тохиолдолд Мандах ИС-д элсээгүйд тооцно.
4. Элсэх эрх авсан элсэгч суралцах гэрээгээ цуцласан тохиолдолд сургалтын урьдчилгаа төлбөрийн 10 хувийг суутгана.
5. Оюутнаар батлах захирлын тушаал гарснаар Мандах Их Сургууль болон БСШУСЯамны мэдээллийн нэгдсэн санд бүртгэгдэнэ.

ЗУРГАА. ЭЛСЭГЧДЭД ҮЗҮҮЛЭХ ХӨНГӨЛӨЛТ

1. Бакалаврын өдрийн хөтөлбөрийн элсэгчийн үндсэн шалгалтын оноог харгалзан, эхний хичээлийн жилийн сургалтын төлбөрийг дараах хэмжээгээр хөнгөлнө. Үүнд:

   №	Үндсэн шалгалтын оноо	Хөнгөлөлтийн хувь
   1	700-ээс дээш оноотой бол	50%
   2	650-699 оноотой бол	30%
   3	600-649 оноотой бол	20%

2. Мандах Их Сургуулиас зохион байгуулсан математик, англи хэлний олимпиадуудад, эссэ бичлэгийн тэмцээнд амжилттай оролцсон бол сургуулиас олгосон суралцах эрхийн бичгийг үндэслэн шууд элсүүлэх бөгөөд заагдсан сургалтын төлбөрийн хөнгөлөлт эдэлнэ.
3. Элсэгч нь сүүлийн 2 жилд улсын болон нийслэлийн хэмжээний математик, физик, MU-PR-16:2019ST мэдээлэл зүй, англи хэлний олимпиадад 1-10-р байрт шалгарсан бол олимпиадын комиссоос олгосон зохих батламжийг үндэслэн, сургуулийн босго оноог хангасан тохиолдолд шууд элсүүлнэ.
4. Элсэгч нь үндэсний болон олон улсын хэмжээний урлаг, спортын тэмцээн, уралдааны эхний байр (I-III)-т шалгарсан бол зохих батламжийг үндэслэн, сургуулийн босго оноог хангасан тохиолдолд шууд элсүүлнэ.

ДОЛОО. БУСАД

1. Тус сургууль нь дараах заалтад хамаарах иргэнийг элсэлтийн ерөнхий шалгалтгүй элсүүлнэ. (БСШУСЯамны Сайдын А/194 тоот тушаал) Үүнд:
   • Дээд боловсролтой, 2 дахь дээд боловсрол эзэмших иргэн
   • Дипломын боловсролтой, тусгай мэргэжлийн дунд сургуулийг төгссөн, мэргэжлийнхээ дагуу бакалаврын хөтөлбөрт өдөр болон эчнээ сургалтад элсэн суралцах иргэн
   • Гадаад оронд ерөнхий боловсрол эзэмшсэн улс орнуудад нийтлэг хүлээн зөвшөөрөгддөг шалгалтын оноог, боловсролын үнэлгээний төвөөр дүйцүүлэн тооцуулж, дүйцүүлсэн батламж авсан иргэн
   • Гадаад улсын ижил түвшний их сургуулиас шилжин суралцах иргэн
2. Элсэгчдийн гаргасан маргаан, гомдол нь комиссын гишүүдийн буруутай үйл ажиллагаанаас хамааралтай бол сургуулийн холбогдох дүрэм, журмын дагуу тухайн гишүүнд зохих хариуцлага тооцно.
3. Энэхүү журмыг батлагдсан өдрөөс мөрдөнө.

НАЙМ. ЭЛСЭЛТИЙН КОМИСС

1. Хөдөө орон нутгийн элсэгчдийг бүртгэх болон хуваарь сонголтыг "Аймаг, орон нутгаас Монголын Их, Дээд Сургуулиудын Консорциум (МИДСК)-ын гишүүн их, дээд сургуулиудад 2019 онд оюутан элсүүлэх журам"-ыг баримтлан МИДСК-аас томилогдсон элсэлтийн комисс зохион байгуулж элсүүлнэ.
2. Улаанбаатар хотод явагдах элсэлтийг сургуулийн захирлын тушаалаар батлагдсан комисс зохион байгуулна.
3. Элсэлтийн комиссын гишүүд дараах үүргийг хүлээнэ.
   • Элсэхээр бүртгүүлэгчдийг хуваарьт өдрүүдэд цахим болон биеэр бүртгэнэ.
   • Элсэхээр бүртгүүлэгчдийг онооны дарааллаар шалгаруулалт хийж, сургуулийн Удирдах зөвлөлөөс тогтоосон хяналтын тоонд багтаан суралцах эрхийн бичиг олгоно.
   • Элсэгчдийн материалыг бүрдүүлж Сургалтын албанд хүлээлгэн өгнө.